БИШКЕК, 1-фев. — Sputnik. "Альфа-Телеком" (Megacom соода маркасы) жабык акционердик коомун сатуу боюнча аукцион сынактын шарты жарыялангандан 90 күндөн кийин өткөрүлө турганын Sputnik Кыргызстан агенттигине Мамлекеттик мүлктү башкаруу фондусунун башчысы Алмазбек Кадыркулов билдирди.
Анын айтымында, сынактын шарттары маалымат каражаттарына эртең жарыяланат. Уюлдук байланыш компаниясын сатуу боюнча алгачкы маалымат өкмөттүн жайында өткөн жыйынында белгилүү болгон. Муну бийлик компаниянын мындан аркы чыгымын көтөр албай тургандыгын жүйө келтирген.
"Альфа Телеком" ЖАК 2009-жылы түзүлүп, жалгыз ээси Алексей Елисеев болгон. Убактылуу өкмөт 2010-жылы компаниянын 49 пайыз акциясын улутташтырып, 51 пайызы Елисеевге караштуу Southfield Management Inc. и Vesatel Unitеd Limited компаниясынын менчигинде калган. Өткөн жылдын июль айында акциянын 51 пайызына салынган сот бөгөтү алынып, мамлекет акциянын 100 пайызына ээлик кылып калган.
Былтыр июнь айынын аягында Жогорку Кеңеш "Альфа Телеком" ишканасын менчиктештириле турган объектилердин катарына киргизген.
