БИШКЕК, 26-янв. — Sputnik. Социалдык фонддун Ат-Башы районундагы башкармалыгынын кызматкерлери жергиликтүү тургундун эмгек китепчесин жасалмалап, 9 жылдык иш стажы кошуп берген фактысы аныкталды. Бул туурасында Башкы прокуратуранын маалымат кызматы билдирди.
"Ат-Башы айылынын тургуну пенсияга чыгуу үчүн башкармалыктын кызматкерлери менен жең ичинен сүйлөшүп, эмгек китепчесине мыйзамсыз иш стажы коштуруп алган. Анын натыйжасында аталган жаран мөөнөтүнөн эрте пенсияга чыккан", — деп айтылат маалыматта.
Бул факты боюнча Ат-Башы райондук прокуратура тарабынан "Кызмат абалынан кыянаттык менен пайдалануу", "Документ жасалмалоо", "Жасалма документти даярдоо, сатуу, пайдалануу" жана "Шылуунчулук" беренелеринин негизинде кылмыш иши козголду.
Учурда тергөө амалдары улантылып жатат.
