БИШКЕК, 23-янв. — Sputnik. Кыргызстанда жалпы салык декларациясын тапшыруу мөөнөтүн 2018-жылга жылдыруу сунушталып жатат.
Депутаттардын тобу "КРнын айрым мыйзам актыларына өзгөртүү киргизүү жөнүндө (мүлктү мыйзамдаштыруу жана декларациялоо маселеси боюнча)" мыйзам долбоорун иштеп чыкты. Анда быйыл жарандардын баары 2015-жылга карата Бирдиктүү салык декларациясын тапшыруу керектиги эскертилет.
Бирок өкмөт ушу кезге чейин маалымат кампаниясын өткөрө элек. Мындан тышкары, долбоордо Мамлекеттик салык кызматы жалпы декларациялоого техникалык жактан даяр эмес экени айтылат.
Мыйзам долбоорун иштеп чыккандар буга чейин Салык кызматынын даярсыздыгы жана жарандардын маалымдар болбогонунан улам декларация тапшыруу мөөнөтү эки ирет жылдырылганын белгилешти.
Муну менен бирге аталган долбоордо 2015-жылдын 31-декабрына чейин жүгүртүүдөн алынган мүлк менен кирешени мыйзамдаштыруу сунушталат.
Документте чиновниктердин мүлкүн декларациялоо маселесин Мамлекеттик салык кызматына өткөрүп берүү каралган.
