БИШКЕК, 15-янв. — Sputnik. Pew Research Center борборунун маалыматы боюнча ислам динин туткан АКШ жарандарынын саны 2050-жылга карата 3,3 миллиондон 8,1 миллионго чейин жетип, калктын 2,1 пайызын түзүп калат.
Буга чейин президенттикке талапкер Дональд Трамп АКШга мусулмандарды киргизбөө керек экенин айтып чыккан. Жарыяланган маалыматта Дональд Трамп АКШ жарандары дүйнөдө эмне болуп жатканын толук түшүнгөнчө мусулмандарды өлкөгө киргизбей турууну сунуштаганы айтылат.
"Иммиграция боюнча акыркы саясый дебаттарда АКШда канча мусулман жашай турганы суралган. Бирок, расмий так санын эч ким билбейт. Себеби, элдерди каттоого алууда диний ишеними суралбайт", — деп жазылган изилдөө документинде.
Окумуштуулар тарабынан түзүлгөн демографиялык моделдин жардамы менен АКШдагы мусулмандардын саны бир пайыздан 2,1 пайызга чейин 35 жылдын ичинде өсөөрү анык болгон.
"Биздин болжол боюнча мусулмандардын саны иудей (5,7 млн.) менен индуист (2,1 млн.) жарандарына караганда тез өсүп баштайт. Изилдөөбүз боюнча 2050-жылга карата мусулмандардын саны 8,1 миллионго жетет", — деп Pew Research Center борборунун социологдору билдирген.
Демографтар мындай өсүүнүн эки себебин аташты — бул иммигрант мусулмандарынын санынын көбөйүшү жана ислам динин туткан үй-бүлөлөрдөгү балдардын саны башка конфессияларга салыштырмалуу көптүгү.
Ошого карабастан, келтирилген маалыматтар боюнча акыркы эки жылдын ичинде ислам дининен баш тарткан жарандардын да саны көбөйгөнү байкалган.
