БИШКЕК, 11-янв. — Sputnik. Россиянын президенти Владимир Путин Германиянын канцлери Ангела Меркель иттен коркорун билбегенин айтты.
2007-жылы Сочиде Путин менен Меркель сүйлөшүп жаткан бөлмөгө орус президентинин ити чуркап киргенде, Меркель чочуп коркуп кеткен. Бир катар дүйнөлүк ЖМКлар муну Путин атайылап кылды деп жазышкан. Германиянын канцлерин 1995-жылы ит тиштеп алгандыктан ал аябай коркуп калган.
"Албетте, мен бул тууралуу эч нерсе билген эмесмин. Тескерисинче мен ага итти көрсөтүм көңүлүн көтөрөйүн дегем. Кийин ал менен түшүнүшүп, бул үчүн кечирим сурагам", — деген пикирин Путин немистердин Bild басылмасына берген маегинде айтты.
Лабрадор Кони Владимир Путиндин шаар тышындагы бир нече жолугушууларында болгон. Ал имараттын ичин ээн-эркин аралап басып, журналисттер турган бөлмөлөргө да кирчү. Басма сөз өкүлдөрү ага сушка, кургатылган нан сыяктуу нерселерди беришчү. 2006-жылы болгон интернет конференцияда Путин ага келгендерди итке тамак бербешин суранган эле.
