БИШКЕК, 8-янв. — Sputnik. Мекемелер аралык түзүлгөн жумушчу топ электрондук төлөм чогултуунун улуттук системасын жактырганын Экономика жана өнөр жай министрлиги билдирди.
Министрдин орун басары Кылычбек Жакыповдун айтымында, австриялык "Kapsch TrafficCom AG" компаниясы менен биргеликте инвестициялык макулдашуу долбоору экономикалык жана укуктук экспертизадан өттү.
"Жыйын жыйынтыгы менен аталган система максатка ылайык жана натыйжалуу деп табылып, өкмөткө аны ишке ашыруу боюнча сунуш берүү чечими кабыл алынды", — деди ал.
Кыргызстандын аймагында жүргөн автобус жана жүк ташуучу унаалардан, ошондой эле чет жерде катталган унаа каражаттарынан электрондук төлөм чогултуунун улуттук системасын ишке киргизүү боюнча сүйлөшүүлөр былтыр башталган. Мында австриялык компания инвестициялык макулдашуунун долбоорун сунуштаган.
