БИШКЕК, 7-янв. — Sputnik. Быйыл Ирандын борбору Тегеран шаарында биринчи жолу мусулман биримдигинин эл аралык кинофестивалы өтө турганын Кинематографты колдоо фонду билдирди.
Маалыматка ылайык, ислам коомчулугунун башын бириктирүүнү көздөгөн бул фестиваль 3-9-май күндөрү өтөрү күтүлүп жатат. Мында сынак улуттук кино жана эл аралык кино жаатында жүрмөкчү.
Уюштуруучулардын билдирүүсүндө фестивалга ислам маданиятынын өнүктүрүү, дүйнө мусулмандарынын тилектештигин арттыруу, ажылык зыяраттын салты, Курман айт, Орозо айт майрамдарына, ыйык Куранга, Мухаммед пайгамбарга арналган тасмалар катыша алат.
Мындан тышкары, исламды туура эмес өңүттө чагылдырган агымдар жана диний багыттар боюнча тартылган даректүү тасмалар сынакка коюлат.
