БИШКЕК, 5-янв. – Sputnik. Акыйкатчы институту балдарга жасалган зордук-зомбулук боюнча козголгон кылмыш иштерин изилдеп чыгат. Бул тууралуу аталган мекеме билдирди.
Маалыматка ылайык, иш-чара мэриянын "Зордук-зомбулуктан жапа чеккен балдарга жардам берүү" борбору жана ЮНИСЕФ менен биргеликте өтмөкчү.
Изилдөөнүн жүрүшүндө кылмыш иштеринин материалдары иликтенип, балдарга социалдык, психологиялык жана юридикалык жактан жардам көрсөтүшөт. Мындан тышкары, балдарга карата жасалган кылмыштын себептери, ошондой эле аларга жардам берүүгө тоскоолдук жараткан факторлор изилденет.
Иш-чаранын жыйынтыгы менен зомбулуктун курмандыгы болгон балдарды коргоонун механизмдерин жакшыртуу ыкмалары иштелип чыга турганы белгилүү болду.
