БИШКЕК, 31-дек. — Sputnik. Дарыгерлердин жаңылыштыгы менен өлдү деп табылган Владивостоктун жашоочусу өлүкканадан соолугуп, өзүнүн кара ашына туш келген. Бул тууралуу "Хасанские вести" гезитине таянуу менен РИА Новости билдирди.
Андан мурунку күнү достору менен ичип отурган киши кезектеги стакандан кийин эсин жоготуп койгон. Жанындагылар полиция менен тез жардам кызматын чакырууга аргасыз болушкан. Дарыгерлер анын жан таслим болгонун айтып, өлүкканага жөнөтүп жиберишкен. Муздаткычта жаткан мас адам соолугуп, эшикти каккылай баштаганда ызы-чуудан жүрөгү түшкөн кезметтеги кызматкер полиция чакырган.
"Бир нече саат мурун өздөрү алып келген "өлүктүн" чыгып келе жатканын көргөн полиция кызматкерлеринин таң калуусуна чек жок эле", — деп жазат гезит.
"Өлүп тирилген" киши өзүн эскерип отурган досторуна кайра барган. Басылма ага эшик ачкан досу ошол эле жерден эс-учун жоготуп койгонун белгилейт.
