БИШКЕК, 25-дек. — Sputnik. Баткен облусунда 36 миң жасалма доллар алып жүргөн криминалдык топ кармалганын ИИМ билдирди.
Маалыматка ылайык, милицияга кылмыш дүйнөсү менен байланышы бар жарандардын баңгизат алуу үчүн жасалма доллар алып жүргөнү тууралуу билдирүү түшкөн.
"24-декабрь күнү иликтөө иштеринин натыйжасында Баткендин Кадамжай шаарында 52 жаштагы жергиликтүү тургун кармалып, андан 36 миң жасалма АКШ доллары алынган", — деп айтылат билдирүүдө.
Аталган факт боюнча кылмыш иши козголуп, кармалган жаран убактылуу кармоочу жайга киргизилди.
Учурда бул кылмыштуу топтун калган мүчөлөрүн аныктоо жана кармоо аракеттери көрүлүп жатат.
