БИШКЕК, 25-дек. — Sputnik. Быйыл жыл башынан асыроого 527 кыргызстандык бала берилип, анын 23ү чет өлкөгө кеткен. Бул тууралуу Sputnik маалымат агенттигине Социалдык өнүгүү министрлигинин үй-бүлө жана балдарды коргоо башкармалыгынын башчысы Жаңыл Жумабаева билдирди.
Анын айтымында, чет өлкөлүктөргө балдарды асыроого берүү боюнча атайын квота жок. Шартка туура келсе балдар бериле берет.
"Быйыл балдардын көбү АКШ менен Швецияга кетти. Алардын баары оорукчан балдар. Асырап алган ата-энелер аларга эки-үч жолудан операция жасатышты. Учурда балдардын абалы жакшы", — дейт Жумабаева.
Чет элде дипломатиялык консулдукта иштеген кызматкерлер асыроого алынган балдарды жана алардын ата-энелерин текшерүүгө алып турууга мүмкүнчүлүктөрү бар. Буга ылайык консулдук тарабынан бир жылда эки жолу балдардын абалы боюнча отчет берилип турат.
Кыргызстанда балдарды асырап алуу үчүн үй-бүлөнүн финансылык жактан толук эркиндиги каралбайт. Маселен, багып алабыз дегендердин туруктуу жашаган үйү жок болуп, бирок туруктуу маянасы же кирешеси бар болсо жетиштүү деп эсептелет.
Асыроого берилген балдардын абалы мамлекет тарабынан 18 жашка чыкканга чейин көзөмөлгө алынганы менен жөлөк пул төлөнбөйт.
Эмгек жана социалдык өнүгүү министрлигинин маалыматы боюнча быйылкы он айдын ичинде республикадагы интернат мекемелерине 327 бала жайгаштырылган.
