БИШКЕК, 25-дек. — Sputnik. Экспорт менен алектенген ишкерлер киреше салыгынан бошотуларын биринчи вице-премьер Олег Панкратов бизнес-коомчулук менен жолугушуу учурунда билдирди.
Анын айтымында, өлкөдөгү товар айлантуунун 70 пайызы Россия менен Казакстанга туура келет. Атка минер ал жактагы абалдын учурда туруксуз экенин эске алуу менен өкмөт каатчылыкка каршы чаралардын комплексин иштеп чыкканын белгиледи.
"Бизнести колдоо максатында экспортерлорду киреше салыгынан бошотуу чечими кабыл алынган. Парламенттик кароосунан өткөндөн кийин аталган мыйзам долбоору күчүнө кириши керек", — деди Панкратов.
Мындан тышкары, ал жергиликтүү өндүрүүчүлөрдү колдоого алуу, орто жана чакан бизнес үчүн улуттук валютада берилүүчү насыялардын үстөгүн азайтуу, салык системасын жөнөкөйлөштүрүү, экспортко ыңгайлашкан продукция чыгарууга даяр ишкерлер үчүн жер бөлүп берүү сыяктуу маселелер карала турганын айтты.
Жыйын соңунда атка минер кыргыз өкмөтү ишкерлер менен кызматташууга дилгир жана даяр экенин кошумчалады.
