БИШКЕК, 23-дек. — Sputnik. Кышкы каникул маалында шаар окуучулары үчүн ийримдер жана спорт секциялары иштей турганын мэрия билдирди.
Мында 15 миң бала кызыккан ийримдерине катыша алат. Бул жерлерде мектеп администрациясы, мугалим жана техперсонал болуп бардыгы 10,7 миң кызматкер иш алып барат.
Октябрь районунда 800 окуучу балдар чыгармачылык борборунда алек болсо, 2 миң 820 окуучу мектептеги ийримдерге барат.
Свердлов районунда бардыгы болуп 4,7 миң окуучу кызыккан ийримдерине барып убакыт өткөрө алат.
Ал эми Ленин районунда жаш техниктер станциясы тарабынан уюшулган ийримдерге 1200 бала бара турган болсо, 4,8 миң окуучу чыгармачыл борборлордо, ал эми мектептеги ийримге 1 миң окуучу катышууга мүмкүнчүлүк алат.
Билим берүү жана илим министрлиги жазгы жана күзгү каникулдардын эсебинен кышкы эс алуунун мөөнөтү 24 күнгө узартуу тууралуу чечим кабыл алган.
