БИШКЕК, 22-дек. — Sputnik. Кыргызстандын милициясы жаштарды сак болууга жана өсүп жаткан диний экстремизм менен күрөшүүдө активдүү болууга чакырды. Мындай сунуш жаштар жана дин темасына арналган конференцияда айтылды.
Ишеналы Арабаев атындагы Кыргыз мамлекеттик университетинде болгон иш-чарага милиция өкүлдөрү, активисттер жана студенттер катышты.
Милиция кызматкерлери радикалдык кадамдарга үгүттөгөндөрдү аныктоо үчүн ишеним телефонун түзүү иштери жасалып жатканын билдирди.
Дин иштери боюнча мамлекеттик комитеттин өкүлү Нурбек Шамралиев алардын мекемеси да бул жаатта иштерди аткарып жатканын кошумчалады.
Ал ошондой эле, ар бир айдын аягында жума күндөрү өлкө аймагындагы мечиттерде чыныгы Исламдын негиздери тууралуу айтып, радикалдык агымдардын торуна түшүп калбоо үчүн түшүндүрүү иштерин жүргүзүүдө.
