БИШКЕК, 22-дек. — Sputnik. Кытай менен Кыргызстандын ортосунда визасыз режим киргизилбей турганын премьер-министр Темир Сариев маалымат каражаттары менен маектешүү учурунда билдирди.
Өкмөт башчы негизинен үстүбүздөгү жылдын 14-17-декабрында Кытайга жасалган расмий сапарынын натыйжасында жетишилген макулдашуулар тууралуу маалымат берип, буга чейин коомчулукта сын пикир жараткан визасыз режим киргизүү тууралуу маселе көтөрүлбөгөнүн айтты.
"Биз бул маселе тууралуу сөз кылган эмеспиз. Кыргызстан менен Кытайдын ортосунда дипломатиялык, кызматтык паспорту бар жактар үчүн визасыз режим мурунтан эле бар. Ал эми ишкерлик максатта жана турист катары келген жактар үчүн сөзсүз түрдө виза алуу режими сакталат", — деди Сариев.
Премьер-министр тышкы саясат маселелери Тышкы иштер министрлиги менен биргеликте тыкыр макулдашылган түрдө гана өкмөт мүчөлөрү тарабынан билдирилерин белгиледи.
"Ал эми аталган маселе боюнча расмий пикир билдирүү экономика министринин компетенциясына кирбейт", — деп билдирди өкмөт башчы.
Сөзүнүн жыйынтыгында Сариев Кыргызстан менен Кытайдын ортосунда иштеп жаткан учурдагы режим кынтыксыз аткарыла берерин кошумчалады.
