БИШКЕК, 21-дек. — Sputnik. "Улан-2" кичи районундагы тогуз кабаттуу 2/13 үйдүн тургундарын сыртка чыгарып, милиция бомба издеп жатканын жашоочулар Sputnik агенттигинин кабарчысына билдирди.
Коңшу турган үйдүн жашоочуларынын айтымында, милиция кызматкерлери тургундардын сыртка чыгуусун суранган. Себеби, жарылуучу зат коюлганы тууралуу билдирүү келип түшкөн.
"Азыр 2/13 үйүнүн тургундары сыртка чыгарылды. Милиция кызматкерлери келишти", — дейт күбө.
Ал ортодо ИИМ аталган аймакта шектүү баштык табылганын билдирип, саперлордун келишин күтүп жатканын кошумчалады.
Бомба коюлганы тууралуу бул акыркы маалымат эмес. Дем алыш күнү да "Манас" аэропортуна жарылуучу зат коюлганы тууралуу билдирүү түшкөн. Жүргүнчүлөрдүн баары сыртка чыгарылган, бирок бомба табылган эмес.
