БИШКЕК, 21-дек. — Sputnik. Казакстандын Алматы шаарындагы базарлардын биринде эмгектенген кыргызстандык мигранттар акысыз медициналык кароодон өткөнүн "Замандаш" ассоциациясы билдирди.
Маалыматка ылайык, иш-чара "Мурас" кыргыз этно-маданий коому жана "Камкордук" кризистик борбору тарабынан уюштурулган. Мында базарда иштеген мигранттар флюорографиядан өтүп жана башка адистерден текшерилүүгө мүмкүнчүлүк алышты.
"Мурас" коомунун төрагасы Руслан Мамыровдун айтымында, учурда кыргызстандык мигранттарга медициналык жардам көрсөтүү маселеси абдан курч турат.
"Бул эмгектенгендердин көбү колу бошобой же финансылык каатчылыктан улам ден соолугуна жетишерлик көңүл бөлбөйт. Мындай иш-чаралар туруктуу мүнөзгө ээ болот деген ишеним бар", — деди ал.
Мигранттардын ден соолугун текшерүү иш-чарасы бир күнгө созулду.
