БИШКЕК, 19-дек. — Sputnik. Ишемби күнү борбор калаанын "Ала Тоо" аянтында өлкөнүн башкы Жаңы жылдык балатысынын оту чоң салтанат менен жанды.
Жаңы жылдык балатыны орнотууга камылга өткөн ишембиде, 12-декабрда эле башталган. Кытайдан алып келинген бул майрамдык символиканын узундугу – 25 метр, өзөгүнүн диеметри — 12 метр. Түркүн түстүү жарык чыгарган 64 миң лампочкалардын жардамы менен балатыга менен улуттук оюу түшүрүлгөн.
Бишкек шаарынын мэри Кубанычбек Кулматов балатынын отун жандыруу салтанатында шаардыктарга чыныгы кубаныч жана жаңы жылдык маанай тартуулоого аракет кылышкандыгын айтты.
"Мэрия бир сом да короткон жок, биз муну беш ай мурда эле ойлонуп баштаганбыз. Негизги көңүлдү аянтты жасалгалоого да бурдук", — деди шаар башчысы Кулматов.
Мэрдин айтымында, атайын берилген түс акырындык менен айланадагы имараттарды жана көчөнү башка да өңдөргө да алмаштырып турат.
"Бул үчүн бардык электрдик кабелдерди жаңыртып чыкканга туура келди", — деди Кулматов.
Балатынын отун жандыруу салтанатына миңден ашуун шаардыктар күбө болуп, аларга кыргыз эстрадасынын өкүлдөрү концерт тартуулашты.
