БИШКЕК, 17-дек. — Sputnik. Жидда шаарынын тергөө жана прокуратура бюросу 11-сентябрь күнү Меккедеги Аль-Харам мечитине крандын кулашына беш адамды күнөөлүү деп тапканын Saudi Gazette басылмасына таянуу менен РИА Новости билдирди.
Маалыматка ылайык, алар компаниянын техникалык, инженердик жана административдик кызматкерлери болуп чыкты.
Кырсык кесепетинен акыркы маалыматтар боюнча 109 зыяратчы каза болуп, 230дан ашуун адам жаракат алган. Бийлик крандын кулашына катуу шамал жана анын туура эмес жайгашышы себеп болгонун ырастады.
"Прокуратура эки ай мурун ишти иликтөөгө алып, шектүүлөрдүн кырсыкка күнөөлүү экенин ырастаган далилдерди тапты. Алар курулуш жүргүзүп жаткан Saudi BinLaden Group компаниясынын кызматкерлери болуп чыкты", — деп жазат басылма.
Азырынча кылмышка шектүүлөрдүн аты жарыялана элек. Иликтөөнүн жыйынтыктары учурда өлкөнүн борбор калаасы Эль-Рияддын тергөө жана прокуратура бюросуна жөнөтүлдү.
Аталган компания мечиттин аянтын кеңейтүү боюнча жалпы суммасы 14 миллиард долларлык долбоорду ишке ашырып жаткан. Оңдоо иштеринен кийин бул мечитке 2,2 миллион адамдын батышы каралган.
