БИШКЕК, 13-дек. — Sputnik. Казакстандан мыйзамсыз күйүүчү май ташуунун көлөмү азая баштаганын Sputnik агенттигине нефтетрейдерлер ассоциациясынын аткаруучу директору Улан Кулов билдирди.
Анын айтымында, өкмөт чек арадагы көзөмөлдү күчөтүп, күйүүчү майды унаа менен ташууга тыюу салып, чек ара аймагында жайгашкан май куюучу жайлар менен иш алып барганын белгилейт.
"Агым болжол менен төрттөн бир бөлүккө азайды, жетишкендик бар, бирок көйгөй түп тамырынан бери чечиле элек", — деди Кулов.
Кыргызстан менен Казакстандын бажы чек арасы жоюлгандан бери күйүүчү майды мыйзамсыз ташуу күчөп кеткен. Расмий сатуучулар менен көмүскө соодагерлердин баасындагы айырма 12 сомго жеткен. Ал эми Экономика жана өнөр жай министрлигинин маалыматы боюнча күнүгө Кыргызстандын аймагына он миңдеген тонна мыйзамсыз май киргизилип турган.
