БИШКЕК, 10-дек. — Sputnik. Мамлекеттик ипотекалык компания жыл аягына чейин турак-жай тармагына 6 миллиард сом жумшап, мамлекеттик кызматкерлерди жеткиликтүү турак-жай менен камсыз кылуу маселесин чече турганын премьер-министр Темир Сариевдин курулуш тармагынын маселелерин талкуулаган жыйында билдирди.
Өкмөт башчы курулуш тармагынын көйгөйлөрүн биргелишип чечүүгө даяр экенин жана бул жаатта бир катар иштер жүрүп жатканын белгиледи. Сариев айрым мамлекеттик органдар жана ишканалар курулуш тармагына бут тоскон учурлар бар экенин айтып, "Түндүкэлектр", "Бишкекжылуулук" сыяктуу ишканаларды уруксат берүүдө курулуш компанияларына жардам берүүгө чакырды.
"Жылуулук, электр энергиясы, коммуналдык тармактарга кошулууда мамлекеттик органдардагы коррупциялык жолдорду толугу менен жок кылуу керек. Бул жаатта көзөмөлдү күчөтөбүз", — деди өкмөт башчы.
Жыйын жүрүшүндө курулуш компаниялары жана тиешелүү тармактагы көйгөйлөр жана аларды чечүү жөнүндө сунуштар айтылып, талкуу жүргөнү маалымдалат.
