БИШКЕК, 5-дек. — Sputnik. Бишкек шаарынын Октябрь районунда "Балдардын коопсуздугу биздин колдо" аттуу сынамак долбоор ишке кирди. Ага ылайык, мектеп окуучуларынын коопсуздугу атайын чип жана видеобайкоо аркылуу камсыздалат. Бул тууралуу Бишкек мэриясынын маалымат кызматы билдирди.
Сынамак долбоорду ишке ашыруунун алгачкы кадамы мектептерге заманбап видеобайкоо системаларын орнотуу болуп саналат. Ал коопсуздук кызматынын ишин бир топ жеңилдетип, окуучуларга көзөмөл кылууну жакшыртат.
Башында долбоорду ишке ашырууга кеткен каражатты донорлор – эл аралык уюмдар өз мойнуна алат. Эгер бул долбоор ийгиликтүү ишке ашса мектепке чейинки мекемелерге жана мектептерге бул системаны киргизүүгө кеткен чыгымды алар үч жылга чейин каржылайт. Бул мөөнөт аяктагандан кийин чыгымдардын ордун жабуу милдетин окуу жайдын жетекчилиги жана ата-энелер алат. Болжол менен бир айга бир балага 200 сомго жакын каражат кетиши мүмкүн.
Буга чейин өкмөт башчы балдарга карата кылмыштуулуктун алдын алуу боюнча түшүндүрүү иштерин күчөтүүнү талап кылган. Ошондой эле өлкөнүн бардык мектептерине видеобайкоо коюу үчүн каражат табууну тапшырган.
