БИШКЕК, 1-дек. — Sputnik. ИМдин (арабча –ДАИШ) өкүлдөрү Борбордук Азия өлкөлөрүндө, анын ичинде Афганистанда пайда болгону туурасында АКШнын маалыматы бар. Бирок бул азырынча олуттуу көйгөйгө айлана элек дейт НАТОдогу АКШнын туруктуу өкүлү Дуглас Льют.
"Ислам мамлекети" тобуна (араб тилинде — ДАИШ) Кыргызстанда жана башка көп сандагы өлкөлөрдө тыюу салынган.
"ДАИШтин чакан топтору Афганистанда гана эмес, Түштүк жана Борбордук Азияда да пайда болду деген билдирүүлөр бар. Бирок азырынча муну афган бийлиги олуттуу маселе катары кабыл алган жок. Бирок ДАИШ пайда болуп жаткан бардык жерде эл аралык абал курч болууда", — деди Льют Брюсселде журналисттер менен маектешип жатып.
