БИШКЕК, 1-дек. — Sputnik. Токмок шаарынын тушундагы Бишкек — Торугарт унаа жолунун 60-чакырымында жүк ташуучу "Исузу" унаасы менен микроавтобустун кагылышуусунан бир адам каза болуп, дагы 12 киши түрдүү жаракат алганын ӨКМ билдирди.
Маалыматка ылайык, жабыркаган 12 жүргүнчүнүн баары "Тез жардам" менен ооруканага жеткирилген. Алардын арасында бир жашар ымыркай бар.
Дарыгерлердин аракетине карабай, түндө саат 22.33тө кырсыкка туш болгондордун бири 48 жаштагы Зейнап Айтакеева көз жумду. Мындан тышкары, 23 жаштагы Мухамбет Чиров оор абалда реанимация бөлүмүндө экени айтылууда.
Окуя болгон жерге келген куткаруучулар жабыркагандарга биринчи медициналык жардам көрсөтүшкөн. Учурда кырсыктын чоо-жайы иликтенип жатат.
