БИШКЕК, 30-ноя. — Sputnik. Араван районундагы Мангыт айылдык мектептин курулушун кечиктиргендер жазага тартыла турганын премьер-министри Темир Сариев Ош облусуна болгон иш сапарынын учурунда билдирди.
Араван районундагы 500 ашуун бала билим алып жаткан Бекенов атындагы мектеп 17-ноябрдагы жер титирөөнүн кесепетинен жабыркаган. Окуу-жайы 1987-жылы курулуп, андан бери карай оңдоодон өткөрүлгөн эмес.
Ошондой эле Сариев өкмөткө караштуу Архитектура, курулуш жана турак-жай агенттигинин ишин сынга алып, Ош облусунун Араван районундагы Мангыт айылдык мектебинин курулуш мөөнөтүн сактабагандыгын айтты.
Мурда маалымдалагандай, бир нече жер титирөөдөн соң, бул окуу жайы авариялык абалда деп таанылып, балдар чатырларда билим ала баштаган. Учурда окуучуларга сабак окууга ыңгайлаштырылган үйлөрдө өтүүдө.
"Кызматтык иликтөө жүргүзүп, кайсы себепке байланыштуу иш өз мөөнөтүндө бүткөрүлбөгөндүгүн аныктоо жана күнөөлүүлөрдү мыйзам иретинде жоопко тартуу зарыл. Курулуш үчүн акча каражаты толук түрдө бөлүнгөн, бирок мектеп али бүтпөй турат. Балдар чатырларда билим алууда. Мындайга жол берилбеши керек", — деди Сариев.
Маалыматка ылайык, подрядчыларга байланышкан көйгөйлөрдөн улам сот териштүүлөрү жүрүп, натыйжада курулуш иши создугуп кеткен. Учурда имараттын биринчи кабаты гана курулууда. Долбоордук планга ылайык, эки кабаттуу окуу-жайы 300 орунга ылайыкталган, ал үстүбүздөгү жылдын соңуна дейре ишке берилиши керек. Бирок курулуш белгиленген мөөнөттө бүтпөй калышы ыктымал.
