БИШКЕК, 29-ноя. — Sputnik. Шотландия жана америкалык окумуштуулар 90 миллион жыл мурун Жерде жашаган байыркы гигант жыландын калдыгын таап чыгышканын Science Advances журналы жазып чыкты.
Маалыматта бул табылга жыландардын эмне үчүн колу-бутунан айрылып, сойлоп калганынын себебин ачыкка чыгарары айтылат.
"Биздин божомолубузда жыландар ийин каза баштагандан кийин колу-бутунан ажыраган", — дейт Эдинбург университетинин өкүлү Хунъюй И.
Окумуштуулардын айтымында, ички кулагынын ири көлөмү жылан жерде же сууда эмес, ийинде жашап келгенин тастыктайт.
Илимпоздор табылган жыландын 90 миллион жылдык тарыхын жана андан мурунку табылгалардын негизинде жыландар мурда колу-буттуу экенин, качан гана ийин каза баштаганда сойлоп калганын ишенимдүү айтууга болорун белгилешти.
