БИШКЕК, 27-ноя. — Sputnik. Жалал-Абадда Жаңгак фестивалы өткөнүн Экономика жана өнөр жай министрлиги билдирди.
Маалыматка ылайык, бул иш чара Жалал-Абаддагы жаңгак токойлорунун көйгөйлөрүнө коомчулуктун көңүлүн бурууну максат кылган. Анын алкагында көргөзмө-жармаңке уюштурулуп, жаңгак менен токой азыктарынан даярдалган даамдар тартууланды.
Мындан тышкары, "Жаңгак токойлорунун бүгүнкү абалы" жана "Жаңгак сатуунун көйгөйү" темасына арналган эки семинар өттү.
Кыргызстандын улуттук байлыгынын катарына кирген жаңгак токойлору негизинен Арсланбопто жайгашкан. Ал Базар-Коргон, Ноокен жана Сузак райондорунда көп өстүрүлөт. Жалал-Абад облусунда 19 миң гектар токойдун 4,5 миң гектарын жаңгак бактары ээлейт.
