БИШКЕК, 26-ноя. — Sputnik. Пара алган жеринен үйүнө качып кирип бекинип алган тергөөчүгө карата "Тергөөгө жолтоо кылуу" беренесинин негизинде кылмыш иши козголгонун Башкы прокуратура билдирди.
Маалыматка ылайык, Ысык-Көл РИИБдин тергөөчүсү үстүбүздөгү жылдын 24-ноябрында болжол менен 20.30да 20 миң сом өлчөмүндө пара алгандан кийин Башкы прокуратуранын кызматкерлеринен качып кетүүгө үлгүргөн.
Милиция кызматкерлери тергөөчүнү үйүнөн кармашкан. Бирок териштирүү маалында Ысык-Көл РИИБдин айрым кызматкерлери менен бирге 10-12 белгисиз жарандар кирип келип, милициянын ишине жолтоо кылган. Алынган паранын изин жашыруу максатында тергөө башкармалыгынын кызматкерлерин опузалап, күч колдонушкан.
Учурда тергөөчү Бишкек ШИИБдин убактылуу кармоочу жайына киргизилип, тергөө иштери улантылууда.
