БИШКЕК, 26-ноя. — Sputnik. Алты миллионунчу кыргызстандык кыз үй-бүлөдө алтынчы болуп төрөлүп, ага Айлин деген ысым беришти. Бул туурасында Sputnik маалымат агенттигине үй-бүлөнүн башчысы Улуттук Гвардиянын Оштогу бөлүгүнүн командири Алмазбек Кожошев билдирди.
Кыргызстандыктардын санын алты миңге жеткирген атактуу бөбөк кечээ, Ош шаарында 18:12де 3 кг. 870 грамм менен жарыкка келди.
Апасы — Рахат Белекова үй кызматкери, ал эми атасы Алмазбек Кожошев — Улуттук Гвардиянын Оштогу бөлүгүнүн командири.
Кожошев алты миллионунчу Айлинге президент үй бере тургандыгын Sputnik маалымат агенттигинен уккандыгын айтты. Алар беш баласы менен Ош шаарында батирде турушат.
Айлиндин атасы төрөлө турган ымыркайы кыргызстанда алты миллионунчу болуп каларын күтпөгөндүгүн билдирди.
"Өтө кубанып, толкунданып турам. Менин кызым алты миллионунчу болот деген ойго деле келген эмес. Бул биз үчүн күтүүсүз болду", — деди Кожошев.
Ош облустук ооруканасынын жетекчиси Шайырбек Сулайманов төрөт жеңил өткөндүгүн, эне-бала өздөрүн жакшы сезип жаткандыгын билдирди.
