БИШКЕК, 26-ноя. — Sputnik. Россиялык Су-24 учагынын аткыланышы эл аралык укуктардын одоно бузулушу катары баалана турганын Жамааттык коопсуздук келишим уюмунун (ЖККУ) Туруктуу кеңешинин чукул жыйынында айтылды.
25-ноябрда Россия тараптын демилгеси менен (ЖККУ) Туруктуу кеңеши чукул жыйынга чогулду. Ага уюмдун башкы катчысынын орун басарлары, катчылыктын жана ЖККУнун бирдиктүү штабынын кызматкерлери катышты.
Жыйында Россиянын Куралдуу күчтөрүнүн башкы штабынын расмий өкүлү Түркиянын F-16 учагы атып түшүргөн Су-24 аскер учагы тууралуу фото, видео материалдар менен тааныштырды.
Учактан чыкканга үлгүргөн россиялык эки учкучтун бирөө жерден атылган октон каза болсо, бирөө орус аскерлери тарабынан аман-эсен куткарылган.
Аталган инцидент эл аралык укуктардын одоно бузулушу катары бааланып, Сирия аймагына учуулардын коопсуздугун сактоо боюнча меморандумду бузуу болуп эсептелет.
Дүйнө коомчулугу Сириядагы согушту тынчтык жолу менен чечүүгө аракет кылып жаткан учурда мындай окуянын болушун жыйындын катышуучулары одоно ката деп белгилеп, жагдайдын кайталанбашы керектигин айтышты.
Орус президенти Владимир Путин Түркиянын мындай аракетин аркадан урулган бычак катары сыпаттаган.
