БИШКЕК, 26-ноя. — Sputnik. Алты миллионунчу жаран кайсы үй-бүлөдө төрөлгөндүгүн өлкө башчысы Алмазбек Атамбаев айтат. Бул тууралуу Sputnik маалымат агенттигине өкмөттөгү ишенимдүү булак билдирди.
Анын айтымында, өкмөттүк атайын комиссия юбилейлик сан менен төрөлгөн ымыркайды аныктап, аны Темир Сариевге билдирет. Учурда алты миллионунчу жаран ким экенин атайын комиссия тактап жатат.
Бишкек мэриясынан маалымдашкандай, алты миллионунчу жарандын урматына Ала-Тоо аянтында атайын концерт уюштурулат.
Саламаттык сактоо министрлигинен маалымдашкандай, бир саатта өлкө аймагында орто эсеп менен 10дөн 18ге чейин ымыркай төрөлөт.
Мындан он үч жыл мурда, тактап айтканда 2002-жылы 27-августта Кыргызстандын беш миллионунчу жараны болуп Тынчтыкбек Курамаев жарыкка келген. Быйыл ал 13 жаш — биринчи мүчөл жылын белгиледи.
