БИШКЕК, 23-ноя. — Sputnik. Азия футбол конфедерациясынын башчысы шейх Салман бин Ибрагим Аль-Халиф Кыргызстанга келип, эки мини-футбол аянтчасынын ачылыш аземине катышты.
Футбол федерациясынын колдоого алган долбоорлорунун бири болгон оюн талааларынын курулушу федерациянын аймагында былтыр башталган.
Аталган программа боюнча Бишкекте төрт, ал эми Ош облусунда эки мини-футбол талаасынын курулушу пландалган.
Федерациянын президенти Семетей Султановдун айтымында, акыркы убакта чоң жумуштар аткарылып, анын жемиштери байкалууда. Буга кыргызстандык команданын 2018-жылы боло турган Дүйнө чемпионатынын тандоо турунда көрсөткөн оюну жана Азия чемпионатына квалификацияланышы айкын күбө.
Өз кезегинде шейх Салман мындай долбоорлор аркылуу конфедерациянын балдар арасындагы футболго колдоо көрсөтүп жатканына ыраазычылык билдирди.
Ал Кыргызстандын Футбол федерациясы АФКнын жаш жана активдүү өнүгүп келе жаткан мүчөсү экенин белгиледи.
Султанов менен шейх Салман бири-бирине белек ыроолоп, АФК президенти салт боюнча жаңы оюн талаасынан топ тепти.
