БИШКЕК, 23-ноя. — Sputnik. Кыргызстандык кол өнөрчүлөрдүн делегациясы Германиянын Берлин шаарында өткөн прикладдык искусство жана элдик чыгармачылыктын "Bаzaar Berlin-2016" аттуу эл аралык ири көргөзмөгө катышканын Тышкы иштер министрлиги билдирди.
Маалыматка ылайык, иш-чара 17-22-ноябрь күндөрү өткөн. Көргөзмөдө биринчи жолу нарындык уздардын колунан чыккан буюмдар эл назарына тартууланды. Мындан тышкары, иш-чарага төбөсү көрүнгөн бир катар кыргызстандык ишканалар да катышты.
Кыргызстандын стенди көргөзмөнүн үч бөлмөсүнө жайгашкан. Ал жакта мастер-класстар өтүп, жогорку сапаттуу табигый материалдардан жасалган улуттук кийим-кече менен буюмдар көрсөтүлгөн.
Эл аралык көргөзмө "Мессе" комплексинде 1962-жылдан бери өтүп, дүйнөдөгү абройлуу иш-чаралардын бири болуп саналат.
