БИШКЕК, 23-ноя. — Sputnik. Япония Бишкек — Ош унаа жолундагы Көк-Арт көпүрөсүн оңдоого 1 миллиард 196 миллион йен (болжол менен 9,8 миллион доллар) бөлөт.
Транспорт жана коммуникация министрлиги Кыргызстан өкмөтү менен Япон эл аралык кызматташуу (JICA) агенттигинин ортосундагы гранттык макулдашууну ратификациялоо долбоорун Жогорку Кеңештин кароосуна алып чыгат.
Негиздемеде айтылгандай, Бишкек — Ош унаа жолу насыя эсебинен реабилитацияланганы менен Маданият — Көк-Арт тилкеси (70 чакырым) ошол маалда абалы талаптагыдай болгондуктан, долбоорго кирбей калган.
Көпүрө оңдолбогон тилкеде жайгашкан. Ал 1969-жылы курулуп, акыркы 20 жыл ичинде ремонттон өткөн эмес. Министрлик 1998-жылы Сузактагы сел көпүрөнүн тирөөчтөрүн бузуп кеткенин белгилейт.
Өкмөт реконструкция маселесин артыкчылык катары карап, Япониянын өкмөтүнө көпүрөнү толугу менен алмаштырууга жардам берүү өтүнүчү менен кайрылган.
