БИШКЕК, 22-ноя. — Sputnik. Премьер-министр Темир Сариев Муратбек Рыскулов атындагы музыкалык драма театрынын кыргыз маданиятында ɵзгɵчɵ орунду ээлеген жай экенин белгилеп, анын деңгээлин көтөрүү мезгили келип жеткенин облусту кыдырып жүргөндө билдирди.
Ал Нарын музыкалык драма театры кезегинде атагы алыска кетип, эң таланттуу актер, режиссерлордун уясы болгондугуна токтолду.
"Акыркы учурда ɵз деңгээлинде кɵңүл бурулбай, имараты оңдоого муктаж болуп калыптыр. Маданияттын очогун оңдоо үчүн президенттин тапшырмасынын негизинде 25 миллион сом бɵлүнүп берилет. Бул каражатты майнаптуу колдонуу менен чатырын жаап, сырткы кɵрүнүшүн иретке келтирүү зарыл", – деди Сариев.
Премьер-министр театрдын жылуулук системасын оңдоо зарылдыгын белгилеп, бул боюнча сунуш даярдоону тапшырды. Ага ылайык кошумча каражат бɵлүп берүү маселеси каралат.
