БИШКЕК, 22-ноя. — Sputnik. Премьер-министр Темир Сариев өлкөнүн бардык мектептерине видеобайкоо коюу үчүн каражат табууну тапшырды. Мындай чечим министрлер менен болгон жыйында кабыл алынганын өкмөттүн маалымат кызматы билдирди.
Ички иштер министрлигинин маалыматына ылайык, өспүрүмдөргө карата 755 кылмыш иши жасалса, анын 570и сотко өткөн.
Сариев ошондой эле, балдарга карата жасалып жаткан кандайдыр бир кылмыштардын болтурбоо үчүн профилактикалык иштерди күчөтүү керектигин белгиледи.
"Бул жаатта министрлик, ведомстволор жана жергиликтүү өзүн-өзү башкаруу органдары тыгыз иш алып барышы зарыл. Райондун акимдери, айыл өкмөт башчылары мектептерге видеобайкоо орнотуу үчүн каражат табыш керек", — деди ал.
Өкмөт башчы ошондой эле, балдарга карата жасалган ар бир кылмыш тыкыр иликтенүүгө алынышын баса белгиледи.
