БИШКЕК, 18-ноя. — Sputnik. Финляндиянын Турку шаарында өткөн IV Эл аралык хор, аспаптык музыка жана академиялык вокал сынагында кыргызстандык Бүбүгүл Искенова бай байгеге ээ болгонун Маданият, маалымат жана туризм министрлиги билдирди.
Конкурс үстүбүздөгү жылдын 6-10-ноябрь күндөрү өтүп, өнөрпоздор үч багыт боюнча ат салышкан. Искенова сынактын "Аспаптык музыка" бөлүгүндө фортепианодо ойноп мыктылыгын көрсөттү.
Маалыматка ылайык, Бүбүгүл Искенова учурда Герцен атындагы Россия мамлекеттик педагогикалык университеттин 3-курсунда билим алат. Бир катар эл аралык конкурс, фестивалдардын лауреаты.
