БИШКЕК, 17-ноя. — Sputnik. Алмазбек Атамбаевдин Кыргыз киносунун күнү менен куттуктады. Президент учурда кыргыз киносу кайрадан жанданып, улам бийик серени карай көтөрүлүп баратканына күбө болгондугун айткан.
Ал кыргыз кино өнөрүнүн корифейлерин белгилеп, алардын аталган тармактын тирөөчтөрү болгондугуна токтолгон.
"Белгилүү кино актерлор Муратбек Рыскулов, Болот Бейшеналиев, Сүймөнкул Чокморов, Даркүл Күйүкова, Таттыбүбү Турсунбаева, Сабира Күмүшалиева, Бакен Кыдыкеева, Советбек Жумадылов жана башка чеберлер ошол "кыргыз кереметинин" символдоруна айланды", — деген Атамбаев.
Ал Кыргызстан эли Мелис Убукеев, Болот Шамшиев, Геннадий Базаров, Төлөмүш Океев, Альгимантас Видугирис жана башка чыгаан режиссерлеру менен сыймыктанарын айткан.
Мамлекет башчысы Кыргыз кинематографиясынын калыптанышына Москва жана Ленинград киномектептеринин чеберлери көп салым кошкондугун белгилеген.
"Алардын көмөгү аркасында материалдык-техникалык база түзүлүп, кыргыз кинематографиясынын улуттук кадрлары даярдалды. Кийинчерээк дал ошол адистер дүйнө элин кино искусстводогу кайталангыс көрүнүш – "кыргыз керемети" тууралуу кеп кылууга мажбур кылды",— деген баасын берди.
Мамлекет башчысы залкар жазуучу Чыңгыз Айтматовдун кыргыз кинематографиясынын өнүгүшүнө зор салымын белгилеген.
"Чыңгыз Айтматовдун чыгармалары керемет кинофильмдердин тартылышына түрткү берип, ал тасмалар улуттук кинонун алтын фондуна кирип калды", — дейт президент.
Президент улуу муундагы режиссерлор, сценаристтер жана артисттер калыптандырып кеткен жакшы салттарга таянып, кинематографисттердин жаңы мууну өсүп келе жаткандыгын белгилеген.
