БИШКЕК, 12-ноя. — Sputnik. Премьер-министр Темир Сариев өлкөдө клубдук футболду өнүктүрүү боюнча талкуу өткөрүп, ага Кыргызстандагы ири компаниялардын өкүлдөрү, Футбол федерациясынын мүчөлөрү жана футбол ишмерлери катышты.
Ал учурда дүйнөдөгү кырдаал жана аймактагы коопсуздук маселелери курч туруп, радикалдуу ар түрдүү агымдар көбөйүп жатканын жана жаштардын бул агымдарга кирип жатканын билдирди.
"Жаштардын мындай туура эмес жолго түшүп кетишинен эки нерсе гана сактайт. Биринчиси, сапаттуу билим, экинчиси спорт жана дене тарбияны жайылтуу. Ал эми спорттун эл арасында эң жайылган түрү — бул футбол. Биз аны өнүктүрүү менен жаштарды сергек жашоого тартышыбыз зарыл. Ал эми футболду өнүктүрүү үчүн клубдар арасында атаандаштык зарыл", – деди Сариев.
Премьер-министр учурда Кыргызстандын футбол боюнча жогорку лигасында алты гана команда катышып, атаандаштык болбой жатканын айтып, өлкөдөгү ири компанияларды футболдук клубдарды түзүүгө жана каржылоого чакырды.
"Акыркы учурда футбол боюнча Кыргызстандын курама командасы татыктуу оюн көрсөтүүдө. Өлкөдө футболдук дух пайда болду. Эгер биз футболдук клубдардын санын көбөйтүп, атаандаштыкты күчөтсөк дагы жакшы жыйынтыкка жетишүүгө болот. Биз жогорку лигада ойногон командалардын санын 10-12ге жеткирүү менен атаандаштыкты күчөтүүгө болот", — деди Сариев.
Өкмөт башчы ири компаниялардын өкүлдөрүнө аймактардагы спорт жайларын өнүктүрүүгө салым кошууга чакырды.
Жолугушуу жыйынтыгында ал Спорт жана дене тарбия агенттигине өлкө аймактарындагы футболду өнүктүрүү үчүн "Булгары топ" мелдешин жандантууну тапшырды.
