БИШКЕК, 11-ноя. — Sputnik. Белоруссия соту Евробиримдик мамлекеттерине мигранттарды мыйзамсыз өткөрүп келген кыргызстандык жаранды үч жылга эркинен ажыратканын Мамлекеттик чек ара комитети Sputnik Белоруссия агенттигине билдирген.
Мигранттардын тобун Шенген макулдашуусу жайылтылган мамлекеттерге өткөрүү кирешелүү бизнеске айланып, бул Белоруссияга СССРдин ар кыл бурчунан "гастролерлорду" тартууда.
"Лид райондук сотунун чечими менен жазында сегиз вьетнамдыкты Белоруссия менен Литванын чек арасынан өткөрүүгө аракет кылган кыргызстандык жаран мүлкүн конфискациялоо менен үч жылга эркинен ажыратылды", — деп билдирди Sputnik агенттигине Лид чек ара отрядынын маалымат катчысы Валерий Поздняков.
Анын айтымында, мыйзамсыз мигранттардын тобу "Нача" чек ара постунан аныкталган.
Чек арачылар мындай учурларга көбүнесе Белоруссия чек арасынын батыш аймагында туш болуп жатышканы айтылууда.
"Бул мигранттар тарабынан берилип жаткан ири сый акы менен байланыштуу. Мында ар бир өткөрүүчү адам "кардардан" беш миң долларга чейин акча алат", — деп айтылат билдирүүдө.
Үстүбүздөгү жылы аталган аймакта мыйзамсыз мигранттарды чек арадан өткөрүүчү тогуз канал аныкталып, 22 кылмыш тобунун бети ачылып, 87 мыйзамсыз мигрант кармалган.
