БИШКЕК, 10-ноя. — Sputnik. Россиянын Оштогу Башкы консулдугу Кыргызстандын түштүк аймагында жашаган майып адамдарга коляска тартуулады.
Тапшыруу аземине Москва өкмөтүнүн Кыргызстандагы өкүлү Руслан Абдыгулов, Ош шаарынын вице-мэри Ильичбек Эргешов, башкы консул Александр Кудряшов катышты.
Эргешовдун айтымында, социалдык мүнөздөгү иш-чаралардын баары Россиянын башкы консулдугунун колдоосу менен өтүп келет.
"Коляскалардын өтө муктаж жана аларды сатып алууга кудуретсиз адамдарга берилгени абдан жакшы жөрөлгө болду. Шаар мэриясы социалдык долбоорлорду ишке ашырып, калктын аз камсыздалган бөлүгүнө жардам берүүгө дайым даяр", — деди вице-премьер.
Иш-чаранын жүрүшүндө Ош, Жалал-Абад, Кызыл-Кыя шаарынын сегиз тургунуна коляскалар тапшырылды. Башкы консул Кудряшовдун айтымында, бардыгы болуп Кыргызстандын муктаж адамдары үчүн 50 коляска берүү каралган.
