БИШКЕК, 10-ноя. — Sputnik. Россия менен Батыш жалпы коркунуч жараткан "Ислам мамлекети" террористтик тобуна каршы аракеттерде биригүүсү зарыл экенин "Россия сегодня" Эл аралык маалымат агенттигинин жана RT телеканалынын башкы редактору Маргарита Симоньян билдирди.
"Россия сегодня" Эл аралык маалымат агенттиги уюштурган Европа жана Азия медиаларынын форуму (ЕАМФ) бүгүн Москва шаарында өтүп жатат.
"Дүйнө учурда каяктан, кантип келгенибизге, кайда жашарыбызга карабай, баарыбызга бирдей коркунуч туудурган тарапты көрбөй жаткан сыяктуу. Менин баамымда, акыркы учурдагы, керек болсо акыркы аптадагы окуялар — Египеттен бала-чакабызды, жакындарыбызды салып келе жаткан учактын кыйрашын айтар элем — мунун баары адамзат үчүнчү дүйнөлүк согуштун башталышында, болбосо так өзүндө жашап жаткандыгын айгинелеп турат", — деди Симоньян форумда сүйлөп жатып.
Симоньян бул үчүнчү дүйнөлүк согуш салтка айланган атаандаштардын ортосунда эмес, Россиянын батыш дүйнөсү менен же Батыштын Россияга каршылыгынан улам жүрүп жатканын баса белгиледи.
"Кеп чыныгы согуштун жаңы түрү жөнүндө болуп жатат — салттуу эмес ислам менен калган цивилизациялуу дүйнөнүн ортосундагы чабыш жүрүп жатат. Биз калган цивилизациялуу дүйнө менен бир тарапта болууну улантабыз деген пикирдемин", — деди ал.
Бүгүнкү күндө батыш менен Россиянын ортосунда жеңип чыгууга мүмкүн болбогон идеологиялык карама-каршылыктар жок, дейт "Россия сегодня" Эл аралык маалымат агенттигинин башкы редактору.
ЕАМФ-2015 форумунун негизги маселеси — ар кыл саясий жана экономикалык процесстердин шартында мурунку СССР мамлекеттеринин ЖМК менен өз ара кызматташуусу болуп саналат. Иш-чаранын алкагында "Евразиялык маалымат айдыңы: чакырыктар жана тобокелчиликтер", "Медиаиндустрия: аудитория жана имиджди сактоо", "Туруксуз дүйнөдөгү туруктуу өнөктөштүк" сыяктуу үч тематикалык талкуу каралган.
