БИШКЕК, 8-ноя. — Sputnik. Экономика министрлиги Кыргызстандын аймагына киргизилген данга болгон кошумча нарк салыгын алып салууну сунуштап жатканы Жогорку Кеңештин сайтынан белгилүү болду.
Мыйзам долбоорунда Салык кодексине өзгөртүү киргизип, өлкөгө дан ташуучу импортерлорду 2020-жылдын 1-январына чейин 12 пайыздын кошумча нарк салыгынан бошотуу каралган. Бул жергиликтүү өндүрүүчүлөрдү рыноктун терс таасиринин сактоо үчүн жасалууда.
"Мамлекеттин азык-түлүк коопсуздугу көп учурда чет элдик өндүрүүчүлөрдөн көз карандылыкты шарттаган ундун көлөмүнө байланыштуу болот. Андыктан жергиликтүү ун өндүрүүчүлөрдү колдоп, алардын атаандаштыкка жөндөмдүүлүгүн арттыруу үчүн бардык шарттарды түзүп берүү зарыл", — деп айтылат долбоордун негиздемесинде.
Мыйзам долбоорунун авторлору алып келинген данды салыктан бошотуу Кыргызстанда өндүрүлгөн ундун баасын төмөндөтүүгө негиз болуп берерин белгилешүүдө.
Аталган мыйзам долбоору Жогорку Кеңештин кароосуна октябрь айында киргизилген.
