БИШКЕК, 7-ноя. — Sputnik. Кыргызстандын коммунисттери Улуу Октябрь Социалисттик революциясынын урматына салтка айланган митинг өткөрүшкөнүн Sputnik агенттигине Коммунисттер партиясынын мүчөсү, ЖК депутаты Исхак Масалиев билдирди.
Митинг Бишкектин эски аянтында Лениндин айкелинин жанында өттү. Иш-чарага Кыргызстандын Коммунисттер партиясы, Кыргызстандын Коммунисттик партиясы жана "Комсомол" коомдук бирикмеси катышты.
Митинг катышуучулары Лениндин эстелигине жана Апсамат Масалиевдин айкелине гүл коюшту.
Коммунисттер партиясынын өкүлү Исхак Масалиевдин айтымында, митингде Октябрь революциясынын совет элинин тарыхындагы орду талкууланды.
"Ошол кездин жетишкендиктери, мамлекетти башкаруунун жолу, экономиканы өнүктүрүү боюнча маселелер ортого салынды. Мындан тышкары, бизди тынчсыздандырган жагдайлар тууралуу пикир алыштык", — деди депутат.
Жыл сайын 7-ноябрда белгиленүүчү Улуу Октябрь революциясына быйыл 98 жыл толду.
