БИШКЕК, 7-ноя. — Sputnik. Топоздорду асылдандыруу жана кунарын көтөрүү менен окумуштуулар алектениши керектиги "Топозчулукту өстүрүү — тоолуу аймактардын жашоочуларынын социалдык абалын жана турмушун жогорулатуунун негизи" аталыштагы эл аралык илимий-практикалык семинарда айтылды.
Семинарда Кыргызстанда топозду ысырапсыз туруктуу пайдалануу жана генетикалык ресурстарды башкаруу, башка мамлекеттердеги топоздордун айырмасы менен артыкчылыктары, Кыргызстандагы топозчулук маселелери талкууланды.
Биотехнология институтунун директору Асанкадыр Жунушевдин айтымында, иш-чара Топозчулукту өстүрүү, тоолуу жердеги жашаган элдердин социалдык-экономикалык абалын жогорулатуу, топозчуларды жер-жеринде иштетүү маселесине арналууда.
"Окумуштууларыбыз топоздорубузду асыл тукумдаштыруу жана кунарын көтөрүү менен алектениши керек. Топозчулук менен алектенген фермерлердин ишин илим менен айкалыштырып, өнүмдүүлүгүн жогорулатуу зарыл", — деди Жунушев.
Илимий-практикалык семинар эки күнгө созулуп, бүгүн аяктайт.
