БИШКЕК, 6-ноя. — Sputnik. Чүй жана Манас проспектилеринин кесилишинде троллейбустар токтоп, каз катар тизилип калганын Sputnik агенттигинин корреспонденти жеринен билдирди.
"Троллейбустар токтоп калгандыктан, жүргүнчүлөр башка коомдук транспортко отурушту", — деди кабарчы.
Бишкек троллейбус башкармалыгынан билдиришкендей, автотранспорттор электр жарыгы өчүп калгандыктан токтоп калган.
"Биз себебин тактадык. Подстанцияда авария болгон деп жатабыз. Мындай нерсе болуп турат", — деп аталган башкармалыктан маалымдашты.
Бишкек шаарында бүгүнкү күнү троллейбустун сегиз маршруту бар жана күн сайын жолго 70тен ашык автоунаа чыгат. Коомдук транспорттун бул түрүнө негизинен ардагерлер, окуучулар жана студенттер түшөт. Бир жылда троллейбус болжол менен 19 миллион киши ташыйт.
Бишкек троллейбус башкармалыгынын балансында 167 троллейбус бар, анын 161и жүргүнчүлөрдү ташыса, калган алтоо машыгуу жана окуу үчүн колдонулат.
