БИШКЕК, 4-ноя. — Sputnik. Кыргызстандын премьер-министрлигине талапкер Темир Сариев депутаттардын суроосуна жооп берип жатып, президенттикке барар-барбасын убакыт көрсөтөт деп билдирди.
Бул тууралуу Сариевден "Ата Мекен" фракциясынан депутат Сайдулла Нышанов сурады.
"Мен сизге премьерлик тууралуу суроону Экономика министрлигин жетектеп турганда бергем. Өкмөт башчылыгына экинчи ирет талапкер болуп турасыз, суроомду дагы берейин: президенттик шайлоого катышасызбы?", — деди эл өкүлү.
Сариев премьер-министрлик эл алдында да, мамлекет алдында да чоң жоопкерчилик жүктөй турганын белгиледи.
"Менимче, азырынча ушул эле жетиштүү. Сиздер мени бүгүн шайлап, үч айдан кийин ишиме канааттанбай кызматтан алып салышыңар мүмкүн. Мындан улам, бардыгын убакыт көрсөтөт", — деди Сариев.
Жогорку Кеңеш өкмөт башчылыгына талапкер маселесин талкуулап жатат.
