БИШКЕК, 4-ноя. — Sputnik. ЖКнын биринчи эле жыйынында "Өнүгүү —Прогресс" фракциясынын депутаты Зиядин Жамалдиновдун отурган креслосу сынып калды деп билдиришти ЖКнын аппаратынан.
Депутаттар танаписке чыкканда эл өкүлүнө жаңыраагын алмаштырып беришти.
Бүгүн спикер Асылбек Жээнбеков төрагалыкка шайланып жатканда креслолор туурасында сөз болуп, аларды алмаштыруу керектигин айткан.
Акыркы ирет креслолор 2010-жылы алмаштырылган. Буга чейин Жогорку Кеңештин Иш башкармалыгы 120 кресло сатып алуу үчүн 2,6 миллион сомго тендер жарыялап, ал коомчулукта ар кыл пикир, талкууну жараткан. Кийинчерээк ал ЖКнын ошол кездеги төрагасы Жээнбековдун буйругу менен жокко чыгарылган.
Спикер креслону алмаштыруу чечими кабыл алынгандыгын, алар жайга жакын сатып алына тургандыгын айткан.
