БИШКЕК, 4-ноя. — Sputnik. Жол кайгуул кызматы шаарда катталбаган унааларды калаанын чет-жакасына токтотуп, меймандарды шаар ичинде коомдук унаа менен жүргүзүү демилгеси коомчулук тарабынан туура эмес кабыл алынганын аталган мекеме билдирди.
Маалыматка ылайык, мындай демилгени шаардык жол милициясынын башчысы Зумрад Жанабаева Бишкек шаардык кеңештин жыйынында айткан.
Жанабаеванын айтымында, Бишкекке күнүгө шаардык каттоодо турбаган 70 миң унаа кирет.
"Биз болгону борбор калаанын меймандары унаасын шаардын четине токтотуп, өздөрү коомдук транспортто жүрүүсүн тескеген документ иштеп чыгууну сунуштаганбыз", — деп Жанабаева Sputnik агенттигине билдирди.
Ал эми Бишкекте жашап, бирок тыш жакта катталган жаран болгону унаасын шаардык Жол кайгуул кызматынан каттатып коюшу керек.
"Унаа каражатынын көбөйүп, тыгындардын пайда болушу менен жүк ташуучу унааларды шаар ичине киргизип-чыгаруу тартибин белгилөө максатында калк арасында мониторинг жүргүзүү сунушталган", — деп айтылат билдирүүдө.
Учурда Бишкекте 400 миңден ашуун унаа катталган.
