БИШКЕК, 3-ноя. — Sputnik. Бразилияда бир жарым жашар бала менен коркунучтуу жыландын жолугушуусу күтүүсүз бүттү — бала сойлоп жүрүүчүнү өлөрчө тиштегилеп салган да, өзү эч жабыркаган эмес.
Gaucha радиосунун билдирүүсү боюнча, укмуштуу окуя Риу-Гранди-ду-Сул штатынын Мостардас шаарында болгон. Лоренцо аттуу бөбөк үйүнүн короосунда ойноп жатып, жарарака деген жыланга кабылат. Бул сойлоп жүрүүчүнүн уусу кичине балага эмес, чоң киши үчүн да өтө коркунучтуу. Аны Лоренцо тиштегилеп өлтүрүп салганы таң каларлык.
Баланы жылан чагып салдыбы деп корккон ата-энеси дароо бейтапканага алып келишкен, бирок, кудай жалгап, анын организминен уунун белгиси табылган эмес. Бала жабыркамак түгүл, абалы сопсонун экенине дарыгерлер ата-энесин ынандырышкан.
